Thursday 22 July, 2010

ఒకడు కలకంటున్నాడు

ఒకడు కలకంటున్నాడు

రెపరెపలాడుతున్న

తూనీగల్నో తుమ్మెదల్నో పట్టాలని

వెంటాడుతున్న బాల్యపుచేష్టలా

రంగులవైపు పరుగెడుతూ

అందాన్నేదో వెతుక్కుంటూ

అతడు కలకంటున్నాడు



 ఒకడు కలకంటున్నాడు

అలసిన దేహంతో

జాము జాముకు కూసే

కోడిపుంజులా నిద్రిస్తూ

మైళ్ళు, సంవత్సరాల వేగంతో నడుస్తూ

తనలోనికో, బయటకో

విధుల్లోకో దేశాల్లోకో

సముద్రాల్లోకో, దేశదేశాల్లోకో

రహదారి వెంట

రాల్తున్న గుల్మోహర్ రేకల్లా

అక్షరాలను ఏరుకుంటూ

జీవితాన్ని మంత్రించిన పుష్పంచేసి

కాగితపు మడతల్లో

పుస్తకమై నిలిచిపోవాలని

అతడు కలకంటున్నాడు


ఒకడు కలకంటున్నాడు

ఆహ్లాద దేహంతో

కలకనే వేళ

కళ్ళలో గుచ్చుకుంటున్న

ముళ్ళలాంటి వాస్తవాల మధ్య పడిలేస్తూ

పొడిచే ముళ్ళను నరుకుతూ

గాయపడుతూ

గేయమౌతూ

శతాబ్దాలుగా కూరుకుపోతున్న

బురదవీధుల్లోంచి

నల్గురు నడిచే దారికోసం

చూపుడువేలై నిలవాలని

అతడు కల కంటున్నాడు


ఏ కలా లేకుండా

ఎన్ని ఏళ్ళగానో

మోయాలని ప్రయత్నిస్తున్నా

పథకాలు రచిస్తున్నా

ఇప్పుడే ఎదిగొచ్చినవాడు

నగ్నదేహంపై వస్త్రంలా తొడుక్కొని

అడుగులేసే పాదాలకు

పాదరక్షలుగా తొడుక్కొని

క్షణమో అరక్షణమో కాదు

గజమో మైలో కాదు

నిరంతర యానంలోకి

మోసుకెళ్తున్నాడు



నేనే చూస్తూ నిలుచుండిపోయాను

Tuesday 15 June, 2010

హసీనా


1
రాయాలని కలం పట్టగానే
రాణి ఈగను మోసుకొచ్చిన తేనెటీగల్లా
ముసిరే ఆలోచనలు
కాస్త కళ్ళుమూస్తే
ఓ అస్పష్టపు రూపం
పదే పదే
మనసు మానిటర్ పై
కదుల్తూ వెంటాడుతోంది
ఆ రూపం
ఎప్పుడూ పోరాడుతూ
మాట్లాడుతోది, ఏడ్పిస్తోంది

2
కీచకుల చూపులమద్య
ఒంటరి యోద్ధ
గాలికి ఎగిరే కాగితపుముక్కల్లా
మాటల కసువులను
వూడుస్తూ, వూడుస్తూ
బరువెక్కిన చీపురులా
మూలచేరి, మునగదీసుకొని
గాయాల గురుతులను
లవణజలంతో తుడుచుకుంటోంది

3
పుండులా మారుతున్న దేహంపై
కారంచల్లుతోన్న అనుమానపు చూపులు

గాలికి కదిలే ఆకులా
ఆజ్ఞల హుక్కాలను పీలుస్తూ
కదలాడే రెక్కలు

పొద్దుగూకులో వొదిగిన సూరీడులా
గుక్కెడు కల్లు ముంతలోదూరి
అలసిన దేహాన్ని మడచిపెడదామంటే
చిల్లరైనా లేని చిరుగుల సంచి

ఎప్పుడైనా ఒక్కసారి
గొంతు తడుపుకుంటే
జలీల్ చేస్తుందని గలీజు మాటలు

4
చెంపలపై చారికల్ని తుడుచుకుంటూ
చిల్లర ఏరుకుంటున్నప్పుడు
చివరి మజిలీకి సాగిపోతున్న
ఎవరిదో దేహంపై
అనుబంధముందనిపిస్తోంది

అన్నవాహికలో ఎర్పడ్డ అల్పపీడనం
తన దేహపు నలుమూలల్నుంచి
తోడుకుంటూపోతున్న
చారికలని ఎవరికి తెలుసు?

ఒక్కసారి గుప్పిటపట్టిన
కాసులుచెప్పే ఊసుల ధైర్యం
కాసేపయినా
పాతబడిన ఎముకలగూడుకు
ప్రాణంపోసి లేపినప్పుడు
కలలా తిరిగిన కాలచక్రం
గూడిస్తామనే వాగ్దానాల హోరు
కళ్ళముందుంచిన స్వప్నాలజోరు
రాలిపోయిన ఆకుల్లా నేతలతీరు
'ప్రభు' వెక్కడా వున్నాడోనని చిన్ని సందేహం?

5

చీకటి నేత్రంలోపడి
కబేళాల కండలుగా దేహాన్ని కోస్తున్న
కత్తుల వుచ్చుల్లో బిగిసి
గిలగిలలాడినప్పుడు
చెదపట్టిన చెట్టులా
శిధిలమౌతున్న యౌవ్వనజీవనాన్ని
ఎవరిదాహార్తికో పానమై

అరుణుడి కంటపడకుండా దాచిన
పరిమళాల మేనికాంతి
తెల్లటితివాచిగా పరవబడి
చిల్లుల దేహంలో జల్లిస్తున్న కాసులు

అప్పుడే ఆత్మీయపు ముసుగులు తీసి
కాసులేరుకుంటూ లెక్కలుచూస్తుంటే
కాసుల అంచులగుండా కారుతూ
ఎర్రటి తివాచిగా మారుస్తోంది .

6
తెరలు తెరలుగా
తెగిపోయిన జ్ఞాపకాలు
తావిజుల్లా వేల్లాడుతున్నాయి
సిగ్గుమొగ్గల ఎర్రదనం
బుగ్గలపై చేరకముందే
మెడకు పసుపుతాడు బిగిసింది

నవ్వితే మేనికో మెరుపొస్తుందని
తెలిసేసరికి
సుందరస్వప్నాల చానళ్ళన్నీ బంద్

నా యవ్వనం నాకిస్తావా?
నవ్వుల నజరానయిస్తా!

7
ఏం ముద్దొచ్చిందో అయ్యకి అమ్మకి
ఊహతెలిసినప్పటికే
ప్రపంచమంతా గొర్రెలతో బర్రెలతో
రోజూ ఉదయసాయంత్రాలు అడవిలోనే
మేకలకు ఆకులందించటమే

చెల్లీతమ్ముళ్ళను లాలించడమే బాల్యం
ఎవరి సంపదకు కాపో తెలియని
అమాయకత్వం నడుమ
నవ్విన యాది లేదు
మరి నా పేరు హసీనా ఎందుకో?

8
ఎప్పుడైనా
హనుమంతుడి వాకిట్లో
సంబరాల వేడుకల్లో కలసి
బస్తీ వీధుల్లో పీర్లవెనక గెంతిన సమయాలు
మసకబారిన అద్దంలో
మసక మసకగా కనపడుతున్నాయి

కుడి ఎడమల వెతుకులాటలో
ఎటునుంచి ఎటుగా తిరిగి
పొగచూరిందో అక్షరం
ఎక్కడా అంటుకున్న నిశానేలేదు

9
నవ్వులను నజరానా చెయ్యాలనివున్నా
ఎప్పుడో దాన్ని
అవసరాల సీసాలో దింపి బిరడావేసి
ఏ పొరలమాటునో పాతేసాను
నే తవ్వలేను ఆపొరల్ని

నవ్వాలని ఆశరేపి
నన్నెందుకు ఏడ్పిస్తున్నావు?

10
అడవి నీతొకటి నేర్చింది
తోసుకుంటూ
పోరాటమే మనుగడని

అందుకే
ప్రతిచోటా కనపడుతోంది
తన కనురెప్పల్ని మూసుకున్నప్పుడు
ప్రశ్నించుకుంటూంది
నేనున్నది అడవికాదుకదా
నేనెందుకు నిశ్శబ్దాన్ని ఆవరించుకోకూడదని

సరే…
అలానే చేస్తాననుకుంటూ
మగత మగతగా జారే నిద్రనుండి
వులికిపడి రెప్పలు తెరవగానే
కళ్ళెదుట అడవిలాంటి లోకం

అందుకే
వూహలను పగులగొట్టటానికి
పెదవులు విప్పుతాది
విప్పిన పెదవుల్ని మూస్తే అడవి మింగేస్తుంది

11
ఆ పెదవిల ధ్వనిలో
నిరంతర సంగీతం వినబడుతోంది
ఆ గొంతు పడే పదే ఓ రాగాన్ని
ఆలపిస్తూ స్వరాలను సరిచూసుకుంటూంది
ఆ రాగం… ఆకలి రాగం

పేదరికాన్ని తంత్రులు చేసి
గోలెవరిదైనా గెలుపెవరిదైనా
ఎవరినో గెలిపించడానికి
తన్నబడే బంతిలా దొర్లుతూ
బాధలను తబలాలుగాచేసి
ఆలపిస్తునే వుంది

ఆ రాగం కార్మికవాడలోని గొట్టంలా
వూరి మురికిని మోసే మోరీతూములో
అనిపిస్తాది

నిరంతర ప్రవాహంగా ఆలపిస్తూ
తన్ను తాను బ్రతికించుకుంటూంది

12
వింటూ.. వూకొడుతూ…
ప్రశ్నా ర్ధకపు చూపులతో అలక పూనింది

అనునయించే అవకాశం యివ్వకుండానే
నా మేలిముసుగుల గురించి
ఓ మాటైనా చెప్పలేదే అంటూంది

మేలిముసుగు అంచులను పట్టిలాగుతుంటే
సలసలకాగి, ఆవిరయ్యిన
స్వేదపు పొదుగు పితుకుతున్నట్లుంది

పాడిపసువులకు కొమ్ములపై కట్టులతో
ఈతలు లెక్కపెట్టినట్లు
నాభినుంచి పాకిన చారికల్ని చూసి
నీ కానుపుల కష్టాన్ని లెక్కించలేను

పలుకు మెతుకుగా వుడికిన దేహాన్ని
పలావుగా మార్చలేను

అహంకారపు చేతులతో
మామిడిపండులా నలిపి నలిపి
నీ నుంచి జుర్రుకుపోయిన
క్షణాలను లెక్కించలేను

కత్తిరించబడ్డ రెక్కల రక్తస్రావాన్ని
స్పర్శించలేను

ఋతుచక్రపు చట్రంలో చెరగానే
నీ నవ్వుల మోముమీద

నీ కదిలే ప్రతి అడుగుమీద
వేస్తున్న
నిఘాల పరదాలు తొలగించలేను

పందులు వీధుల్లో తిరుగుతుంటే
అసహ్యించుకునె వాళ్ళు

పందిలాంటి కోర్కెల పరదాలతో
మీదపడి రక్కిన గాయాలు
కరన్సీ కాగితంతో తుడుస్తుంటే
మూల్గలేని వేదన
కంఠహారాన్ని తెంపలేను

Wednesday 3 March, 2010

కలైన గోర్వెచ్చని పాట

ఓ తాత పదమెత్తి పాడుతుంటే
అలసి గూటికి చేరిన పక్షులు
రెక్కలు సరిచేసుకుంటూ సేదదీరేవి
దాలిలో మునగదీసుకున్న కుక్కపిల్లలు
చెవులాడించుకుంటూ చూస్తుండేవి
బోదెలో కప్పలో
గట్టుపైచేరి వళ్ళారబెట్టుకుంటుండేవి
పాటతో పాటు వేళ్ళుకదిలేవి
నడుం కదిలేది
పాటపూర్తయ్యేసరికి
వెన్నెల విరగబూసేది

నేస్తున్న నులకమంచం పూర్తయ్యేది
సన్నని పురిపేనిన నులకతో
అల్లిన కౌశలమంతా
రాజమందిరాలలో పరచిన
తీవాసీలా పరుచుకునేది

చేనునుంచో కూలినుంచో
తిరిగొచ్చిన అమ్మో
బాప్పో, పెద్దో, చిన్నమ్మో, మామ్మో
సన్నికల్లుపై నూరిన
మిరపకాయల పచ్చడితో
కూరేదైనా వండి వడ్డించేది

నడుం వాల్చిన తాత చుట్టూ పిల్లలు
ఆ కథలకు పదాల రాగాలకు
వూకొడుతూ వూకొడుతూ
గోర్వెచ్చని కలలకోసం
నిద్రలోకి జారిపోయేవారు

కలచెదరకుండా
ఆకులు, చుక్కలు కావలి కాసేవి
ఆ తాత పాడిన పదం
అప్పుడప్పుడూ నాకు జోల పాడుతుంటుంది
మెలివేసిన మీసం ఊయలూపుతుంటుంది
ఆ నులక కౌశలం కోసం
తాత పదాలు అల్లిన చిత్రం
మాసిపోయిన గ్రామం కోసం 
ఎప్పుడూ ఆత్రంగా వెతుకుతుంటాయి నా కళ్ళు
-------ఈమాట సౌజన్యంతో   < http://www.eemaata.com/em/issues/201001/1513.html>

By V V B Rama rao, Feb 13, 2010
Noida, vadapalli.ramarao@gmail.com
A Warm Song that Remained a Dream

Telugu Original : John Hyde Kanumuri
English Rendering : V.V.B. Rama rao

When the Grand Old Man 'taata' begins singing his lay
Tired birds returning to their nests
Would flap their wings softly in relaxation
Little puppies lying huddled in their warm pit
Would look out wagging their ears
Frogs in the little ditch would come up
And assemble on the bank to dry themselves

Along with the lay fingers would move
Waists would sway to beat time
When the lay draws to an end
It would be moonshine in full bloom
The weaving of country net on the cot gets near completion
All the skill, the knack of fingers
Would make the weave appear like a palace carpet

Moms, aunties, women young and old
Back homes from the fields
Would grind on the stone mortar mirch chutney,
To go with some cooked curry and serve

Round the 'taata' now on his back relaxed on the cot
Little kids would sing along, or listen to tales murmuring m...ms
And slide into slumber for warm dreams to come.
Leaves and stars would stand guard
Not allowing the dreams to fade.

The lay 'taata' sang
Would sometimes sing me a lullaby
The moustache twisted up would rock the cradle
For the deftness of that twine-weaving
For the lays that wove a picture of the faded village
Forever my eyes would eagerly be searching.

curtesy :http://museindia.com/viewrep2.asp?id=19662

Friday 8 January, 2010

ఆట.. ఆట.... ఆటా..???

ఆట వినోదమైన చోట
పావులతోనో
జీవులతోనో
కొనసాగుతూనేవుంది

ఆట కోసం
పావునేదో కదపటం

ఆట కోసం
స్క్రూ బాలుతో
బోర్డంతా
బాలును పరుగులెత్తించడం

ఆటకోసం
కోడిపుంజుకు
జీడిపప్పుతో మేపి
కాళ్ళకు కత్తులు కట్టడం

ఆట కోసం
ఆకలి బానిసచేసి
వేటాడే బోనులో పడేయడం

ఆట కోసం
కుక్కపిల్లకు
అద్దంలోనో
భూతద్దంలోనో
ప్రతిభింభాన్ని చూపి
దొరికిన ముక్కను లాక్కోవడం

మానసిక ఆట
రాజరికపు ఆట
రాజకీయ ఆట

ఇప్పుడు ఆటొక ప్రతీక

ఆటల మైదానంలో
సోలిపోయి ఓడిపోయిన
దేహంపై అమానుషంగా
నడిచే అడుగులను
'are you nat entertained'
అని ప్రశ్నించే
గ్లాడియేటర్ కోసం
ఎదురుచూపు కొనసాగుతూనేవుంది

పావులుకదిపే
ఆలోచనా ప్రవాహానికి
కత్తెర నేనైతే

పరులెత్తించే బంతికి
బ్యాటును నేనైతే

ముక్కల కోసం కాక
విందుకోసమే నేనైతే

వంగి వంగి సలాము కాదు
భుజం కలిపి
నడిచే నవతరానికి
పదండి ముందుకు
నేనున్నా లేకున్నా
జాడలను వెతుక్కుంటూ
పదండి ముందుకు...