Tuesday 14 June, 2011

కోయిల @3.30AM IST

మా ఇంటి చుట్టువున్న చెట్లలోంచి
కోయిల పదే పదే గొంతెత్తి పాడుతోంది
వినడం ఒక్కసారి అలవాటయ్యాక
ఇక ఈ పరుపు దిండ్లపై ఎలా వుండగలను?
బహుశ
వసంతాన్ని ముగించుకొనే తొందరలో
తొలిజాముల సందడిని నా చెవ్వుల్లో నింపుతోంది

మరోవైపు ఇంకో కోయిల
ప్రోత్సాహగీతాన్ని వంత పాడుతోంది

నేనిప్పుడు మరో దినాన్ని జయించడానికి
తొలివెలుగుల కిరణఖడ్గాన్ని ధరించాలి
దుప్పట్లు దులిపి
సాయంత్రం పాడాల్సిన విజయగీతానికి
ఈ కోయిలలు పాడని సరికొత్త రాగమాలపించాలి