కాంక్ష తీరిందో లేదో?

పెదవులకు
ముద్దు కాంక్ష ఎప్పుడు మొదలయ్యింది?

పాఠం చెబుతున్న పెదవులపై
రెప్పలార్పని కాంక్ష

నడకలౌతున్న శరీరం
తరగతి గదులు మారినట్టు
పరీక్షలకోసం చదువుతున్న పెదవులు
లాంతరువెలుగులో తళుక్కుమన్న కాంక్ష

ఊహ రెక్కవిప్పి అక్షారలై చేరిన
తొలి లేఖను
పదే పదే చుంబిస్తున్న పెదవులు
యవ్వనపు గిలిగింతలెట్టిన కాంక్ష

హఠాత్తుగా తగిలిన స్పర్శకు...
కాకతాళీయంగా కళ్ళబడిన నగ్నదేహానికీ...
అదిరిన పెదవుల కాంక్ష

పాలగ్లాసు ఎంగిలిపెదవులు
మరోపెదవుల్ని కప్పుకున్నాయి

కాంక్ష గుండెలో
గుట్టుచప్పుడు కాకుండా దాక్కుంది
కరుణొలికించే మరోపెదవికెలా తెలుస్తుంది?

నెమరువేస్తున్న పెదవులపై
కొత్త చిగురు తొడిగింది
-------------------------------------
చాలారోజుల తర్వాత అక్షరాలు పెనవేసుకున్నాయి
28.01.2012 20.35 hours