కొన్ని నవ్వుల్ని
ఒక దుఃఖం చెరిపేస్తుంది
దుఃఖం దేనికి
పదిలంగా పట్టుకున్న
గాజువస్తువు చేయి జారినట్టు
నాల్గు నవ్వుల మధ్య తెగిపడ్డ మాట
చిగురాకుల్ని
అర్దాంతరంగా ఎవరో తెంపినట్టు
మనస్సు మూలల్లోకి
అల్లుకుకున్న ఆశలతీవె తెగితే
దుఃఖం రాదా!
ఆప్తుల్ని పోగొట్తుకున్న దుఃఖమైతే
పొగిలి పొగిలి ఏడ్వొచ్చు!
ఒకొక్క ఆకు రాల్తుందిక
రొదచేయని మూల్గులు చేస్తూ
* * *
రెక్కతెగిన పక్షి
విలవిలలాడినప్పుడు
దుఃఖధ్వని విన్నావా!
* * *
ఆర్పేసిన కొలిమిలో వేడిమివున్నట్టు
దుఃఖపు వేడి రగులుతూనేవుంటుంది
ఈ దుఃఖాన్ని చెరిపెయ్యడానికి
ఎన్ని నవ్వుల్ని మూటగట్టాలో కదా!
.........01.04.2013
No comments:
Post a Comment