చిట్టి పాదాలు

నీ కోసం ఎంతగా ఎదురు చూస్తానో తెలుసా?
నీకెలా తెలుస్తుంది? 

చిట్టి పాదాలతో
పారాడిన నేలంతా ఎంతగా మారిందో తెలుసా!

పిచ్చిదానా !
ఇంకా నావి చిట్టిపాదలేనా అని నువ్వంటావు

నేను ముద్దాడిందీ
లాల పోసిందీ
యెదపై గిలిగింతగా తన్నిందీ

ఒక్కో నరాన్నీ కూడదీసుకొని
తప్పటడుగులు వేసిందీ
నా కొంగు పట్టుకొని
వంటిల్లంతా తిరిగిందీ
ఆ పాదాలే కదా!

నాకింకా ఆ పాదాలసవ్వడి
మనసు పొరల్లో దాగిన
నా బాల్యం ధ్వనిస్తూనేవుంది

అందుకే నీ కోసం
ఎంతగా ఎదురు చూస్తానో తెలుసా?

****
"రాధిక రిమ్మలపూడి" తో చాలా కాలం తర్వాత చాట్ చేసాక