ఇలాగో అలాగో.. ఎలాగో ఓలాగ
ఎదొకటి రాయాలని
గొంతు గుటగుటమంటుంది
మింగుడుపడనిదేదో నిలువరిస్తుంది
అయినా...
ఏమిరాస్తే ఏంటట
కూటికొచ్చేనా గుడ్డకొచ్చేనా!
నాలుగు చప్పట్లు ఒక్కింత పొంగిన మనసు తప్ప.
***
అప్పుడప్పుడూ వదిలి వచ్చిన అడుగుల చప్పుళ్ళు
మనసును మెలిపెట్టాలని చూస్తాయి
ఒక్కసారిగా గలగల రాల్తున్న శిశిరం నుంచి
అక్కడక్కడా పొడుచుకొచ్చే చిగురు
గాయం కనపడని నొప్పిని రాత్రిలో నింపిపోతుంది
ఇప్పుడు ...
నొప్పిని రాయాలా!
చిగురును స్పర్శించాలా!! ఎప్పటికప్పుడు మీమాంసే
అయినా
ఏదో రాయాలని అనిపిస్తూనే ఉంటుంది
రాసాక
చిగురులోంచి మొగ్గగా రూపాంతరం చిత్రంగా కన్పిస్తుంది
No comments:
Post a Comment